我陰公的牙齒

上一篇講到我暈左入左院
跌完之後d牙好痛
一開始兩邊都幾痛
咬唔到肉
所以一直都食粥
慢慢右身邊好似好返
但左手邊一咬任何一樣野都酸到無力
以為佢會慢慢好返..好似右手邊
點知佢都係咁痛
我好擔心佢有咩事
所以星期五就請左半日假睇肥婆介紹既一個牙醫: 謝杰明醫生
去之前當然SEARCH過佢d資料
哇..好多頭銜喎
哇...成日上電視報紙喎
好似好勁
咁為左d牙好
我都願意俾多d錢去既
準時去到見到醫生
佢人都好好
我同佢講左我暈左啦..之後就食唔到野咁樣
咁佢一開始幫我按下面部唔同位睇下有無傷到
之後就話都無咩問題
再訓係到睇下d牙齒
都好似睇唔到邊隻牙有裂痕咁
之後帶左我去照x光
再用佢部相機係我個口到影數十張相
之後佢就係電腦開哂d相黎同我講解下我d牙
佢話睇到我下巴無碎到
d牙都見唔到有咩裂痕
之後就開始講下我d智慧齒、蛀牙、咩神經線生得好高咁
我個時就同佢講我舌頭FEEL到有一隻牙好似有裂痕啦
咁佢問我邊隻
我開大隻口俾佢睇
佢即刻開返張相指住隻牙話: 喔..咪呢隻囉...佢d牙紋黎家
咁佢話係牙紋我都無辦法
之後就叫我觀察多三星期到睇下仲痛唔痛
如果仲痛就代表真係有裂痕啦
就係咁send我走
俾錢時..佢居然收我700蚊
我聽到都OO地嘴
我咩都無做過..只係照左一張X光同影左D相就700蚊
講真..你話到俾我知我有咩問題我都覺得gur d
佢仲要講到我好似唔係好嚴重咁
真係任佢魚肉囉
我諗問左佢點收費都無用..D價佢講
佢要收700點都整到出黎既
咁我唯有俾錢走人
夜晚返到屋企..仍然覺得個隻牙個條唔係牙紋係裂縫
所以我搵隻手去督下佢
哇...酸痛到呢
我知道隻牙一定裂左啦
唔係個個醫生講既咩牙紋
第二日朝早就去青衣城個牙科車到聽下另一個牙醫既意見
信多次謝杰明真係死左都唔知咩事
我同返個醫生講返我暈左啦..同埋睇過牙醫佢講咩
咁呢個醫生就專同我睇返我覺得痛個隻呀
佢話個條係裂痕黎既
話應該補唔到
要杜牙根
我即刻晴天霹靂
我完全無諗過會咁嚴重
佢無用無崩但居然都要杜牙根
返到屋企即刻google下杜牙根係咩
原來係殺死隻牙..將佢D神經細胞殺死哂
留返個外瞉係到
個醫生臨走前仲叮囑我要盡快去整左佢
因為有細菌同野食會走入去
影響牙骨
因為而家有2個醫生講唔同野
所以我今日再去荃灣睇多個牙醫
個牙醫都係話有裂縫
但佢講得重嚴重
話好大機會杜牙根都唔得
一定要拔左隻牙佢
不過真正係點都係要整走裂左個part再睇睇
唉...
真係好sad囉
好地地一隻牙搞到咁
個隻仲要係大牙
唉~
真係又哂錢又辛苦
好煩呀我覺得
最嬲都係第一個牙醫
仲叫我觀察多3星期
好彩我睇多2個牙醫者
唔係我隻牙死多幾錢重
仲要無啦啦收我咁貴
真係講起就氣忿
我一定會唱衰佢
出名又如何
連牙紋定裂縫都分唔到
連邊隻牙出事都唔知
點做醫生家!!!
算啦
而家要煩去邊到整隻牙

多災多難的十月

話說今個星期一(24/10)
我朝早起身覺得肚仔有少少唔舒服
但因為唔係好勁
所以都無咩理返工
返到公司開始覺得越黎越凍
我就諗應該係我今日著背心裙所以先係咁者
但食lunch開始覺得好似越黎越唔舒服
所以草草食完個飯盒就請左半日SL諗住返屋企抖下
打算睇埋醫生先返屋企
點知去到青衣城個間醫療中心一問..居然已經有28個人排緊
仲叫我拎籌到時再返返黎睇醫生
我心諗我死左啦到時
咁就返屋企樓下睇西醫啦唯有
點知去到居然無開
佢開3點
離哂大譜家
開咁晏
D病人等到都死
咁唯有返屋企訓下先
返到屋企開始覺得全身好熱..頭好痛
我知道自己發燒了..
但照訓
到4點到我BA BA MA MA就搖醒左我叫我落去睇醫生
我BABA陪我落去睇
出門行左幾步就覺得想嘔
以防萬一..叫baba帶定個袋落去
搭LIFT時都OK
但點知由36樓到G樓時
我已經覺得好暈...睇野好濛
之後我講左句: 我好暈
之後發生咩事已經無左記憶
到我記返起就係我baba抱住坐係地下既我係到打緊電話
打緊電話叫我mama落黎
我留意到我自己訓左係個大門口到
旁邊有D人圍觀啦
聽到D人話我面色好倉白..而家好左好多啦
又聽到D人話我下巴流好多血
好彩有好多好心既人俾紙巾我, 幫我地拎住D銀包、眼鏡
我baba就不斷幫我抺汗同埋血
我當時仲係軟手軟腳..連講野既力都無
頭又超痛
過左幾分鐘我MAMA就落左黎
佢即刻幫我查萬金油
哇~~好攻nose呀
但我覺得對我無咩幫助
都係咁軟手軟腳
之後D路人就叫我baba mama扶我去D chair 到坐下
坐左無耐就有一批藍色衫既求護員出現
佢地係咁圍住我量血壓、探熱、幫我戴氧氣罩
有一位救護員就問我一D問題e.g.叫咩名..你點解會出現係到等等
之後佢地幫我檢查我個手腳肋骨等等
最後佢地叫我抬頭俾佢地睇下個下巴時
佢地一睇個個都哇左一聲
話好嚴重..應該要綘針
我心諗唔係掛
過左無耐警察同救傷車就黎左
藍色衫個班救護員同救傷車班救護員交待左我情況後佢地就徹退
之後佢地就送左我上白車
咁佢地話只可以有一個家人跟車
我baba跟車
車上仲有2個救護員
佢地開車到瑪嘉烈
沿途其中一個救護員係咁同我傾計
問我做邊行, 人工幾多等等
其實個時我仲係好頭痛
所以都唔係太想同佢講野
問問下佢就勸我考公務員
又話做銀行唔好
佢知我連二萬蚊一個月都無又係到驚叫
話大學畢業居然連二萬蚊都賺唔到
我都幾無奈
好啦..搖左我諗都有3-4個字終於到左醫院
佢地轉交左俾急症室個邊就閃左人
醫生就黎問下我有咩唔舒服咁
之後就係到等
過一陣就照X光
再過一陣就有人問我個傷口要唔要縫針
佢話我個傷口可以縫可以唔縫
縫就靚D一條線
唔縫就一個圖形咁
佢話縫唔縫都一定有疤
我幾SAD
因為我唔知佢正面係咪會睇到
雖然我好驚痛..但為左靚..縫!!
好啦..簽同意書..入手術室
幫我縫針個個男護士幾好人
會同我傾下計
佢曾經語重心長咁同我講如果我唔怕痛既話可以唔好打針直接縫
因為咁樣縫出黎會靚D
NO LA
我人勁驚痛
我連打針都驚..何況連針
所以我話都係打
哇..打支針真係好痛呀
特別係佢吱D藥出黎個下
打左2支針就開始連
其實無咩感覺
但後尾佢拉線個幾下有少少痛
finally搞左3,4個字到就OK
出返去個護士又係到糾纏我駛唔駛打破傷風針呢個問題
因為呢
破傷風針係一支last for 10年
我對上個次打係小六
而家我未過生日所以22歲
岩岩好擇界
所以佢地苦惱左好耐
咁我咁驚打針
梗係想唔駛啦
最後好彩都話唔駛
之後就搞入院
我入內科及老人科(ward E1)
去到訓8A床
張床...係臨時搭出黎
唔係有欄杆個d..又無枱食飯個d
好陰公
隔離得一個婆婆
佢成日自言自語
叫左我MAMA唔駛黎佢都要黎
搞左一輪佢地都返左屋企
我就打算訓一訓聽日閃人啦
訓訓下時俾人搖醒話要抽鼻液
個護士就一路搞d管一邊講叫我個過程會將支管插入我個鼻抽d野
我以為係好簡單拎下鼻涕咁啦
點知佢話: 你到時唔好爭扎呀..唔係又要重做一次..到時你辛苦咋
我就大驚
心諗咁痛苦既咩
之後佢就拎支我諗同飲益力多飲管粗幼差唔到既管出黎俾我睇
佢話: 插入去支管就係呢支勒..好細咋..唔駛驚
我話喔
佢就話咁我而家開始插入去家啦
我除左話好仲可以點
之後佢就將支管插入我左手邊個鼻孔
一直插一直插..直至佢由個喉嚨位個到出返黎
成個過程痛不欲生
比起之前打既麻醉針..打麻醉針只係食菜
佢抽完就拔返出黎
我就係咁咳係咁咳
眼淚係咁流
我望到佢抽出黎個d係血色既算涕狀物體
好噁心
無奈又又護士黎
我又係受難既時候
佢地黎幫我插支"小豆芽"係左手手背到
一開始我以為要打針
好緊張問佢點解
佢話為左方便我之後吊鹽水個d..
好啦咁...
佢拍一拍我手背搵返d靜脈出黎
拎支針出黎..一下桔落去
哇....又係痛到我發出"嗯.........."一聲
真係好痛
佢插落去時FEEL到支針好長
桔得好入
點知訓左一陣到11點到時就叫醒左我去照磁力共振
因為我知係咩所以我唔驚
坐上輪椅推我去照
返返黎打算訓覺
又俾人叫醒
今次係我入院幫我做檢查個個靚仔醫生
我發現而家d醫生都好後生
佢話要抽血
我心諗..我始終都係逃不過抽血呢一劫
我逃避左咁多年都係要抽
佢係我左手搵到血管就插支針入去
比起之前個d抽鼻液、打麻醉針、小豆芽..抽血簡直係飲水一樣
無得比
之後抽左4支試管到就抽完
我個時係第一次望住自己d血流出黎
好感慨
終於可以訓覺啦
點q知
隔離個阿婆隔一個鐘就大叫一次
次次俾佢嚇醒
只記得有一次佢勁大惡咁講: 你做咩唔俾衫我個仔著呀!!! 搞到佢喊哂..求下你俾衫佢著啦
佢不斷咁REPEAT
搞到護士入黎
護士話俾
佢就無鬧
我真係頂佢唔順
就係咁基本上我成晚無訓過就起身食早餐
早餐係粥
之後9點幾就打去公司請假
到左LUNCH
佢地俾左飯我
有肉有菜
點知我食第一塊肉
兩邊牙都痛到喊
其實我入院時已經有同過咁多個醫生講我左手邊牙好痛
但一直無人理
我個下FEEL到出事
呢個係今日都證實左..不過牙呢單野可以開另一篇再提
咁我食唔到飯..唯有同NURSE講轉一日三餐食粥
成日就咁無無聊聊係到訓下覺/呆坐
點知中午時突然又有人黎話抽血
個時我已經麻木左
默默咁拉高衫袖
佢桔支針落黎抽左2支血走
之後下午去做腦電波
做腦電波個個姐姐好好人
又會同我吹下水
臨到夜晚時..房既另一張床又有個阿婆黎左
個阿婆瘦到令我諗起我阿嫲
佢都好慘
又唔識聽廣東話同講
所以同d護士雞同鴨講咁
佢到夜晚突然抽筋
好彩我發現到話俾護士聽
唔係都唔知點算
所以成晚好多醫生護士圍住佢
我又唔駛訓
間唔中又俾人捉起身打抗生素同探熱
好彩我有小荳芽咋
咁個2支抗生素就直接經小荳芽打入我手到
打入去個感覺好怪
你會FEEL到好似有水漏入隻手袖到
凍凍地向下流
其實係d抗生素流入找d血管到
個晚我發誓我第二日一定要走人
唔係我會癲
第二日
等左好耐醫生終於黎
佢居然話我仲有個24小時心電圖未做
可能要等到聽日
我梗係唔肯
佢話咁你一係出院後再做
我好開心
即刻出院
到拔返小荳芽出黎時
一拔出黎
哇~~~~~~原來都有成3-4CM咁張家支針
怪唔得咁痛啦
就係咁勒
第二日即返工
當然俾人圍住咁慰問啦
佢地仲要係到引我笑
明明我講唔好忍我笑..驚整爆個傷口
但佢地係要講埋d低b野..咩hk'小悅悅..咩那些年，我們一起仆街的女孩
佢地真係無聊
但我返工時勁HEA
光明正大HEA
光明正大發呆、玩SMS
HAHA
星期日就去拆得線啦
其實個疤係下巴到
正面係唔好睇到
但
但我隻牙...下一篇就講下佢啦!!

2011哈囉喂

9月25號時同蕩蕩2個人去左哈囉喂
因為有annual pass
所以百四就有一張夜場飛
諗緊去唔去時就已經淆底
我又驚佢又驚
所以問過幾個朋友有無興趣一齊去壯下膽
可惜呀~
無朋友肯陪我地去
全部都話驚喎
咁我地2個只好梗住頭皮咁去啦
個日5點半開始玩得所有鬼屋
但我地驚人多要排隊所以打算早一個鐘到
點知去到IFC個M記食個20蚊餐塞飽個肚後
去到已經5點半LOL

入場巻

手帶: 白色係普通飛..綠色係"打尖"飛

有D coupon送, 都有用家2張, 嘉禾現金巻同思樂冰

咁就算啦
好彩我已經好熟OCEAN PARK入面既位置
再加上叫左蕩蕩PLAN好我地玩咩先
所以一入到去拎左地圖我地就分秒必爭咁衝去我地第一個TARGET: 3D惡夢潛行

以為已經好多人排隊
點知得個十幾人
咁我地就排啦
個時已經開始落緊雨
要拎把遮出黎啦~
都幾狼狽
一手要拎地圖一手拎遮
因為我地算係頭
所以即刻已經可以入去間館入面排隊
後D既人就要係出面淋雨啦
佢分8個人為一組

係間館入面等時..有幾個著住睡衣既鬼
有個男既都好敬業
會同我地傾計
我見D人都有同佢玩
但我就無啦
因為佢個樣真係幾似精神病人
仲有就係佢一開始突然大叫左一聲
嚇親我
我驚佢又會再大叫
之後原來入面有好多間房
8個人入一間
入面地下同牆都係有畫面
咁就每日係後面個櫃拎一個3D眼鏡
之後隻鬼既職員就會陪我地一齊睇
一開始大家都好驚會唔會有其他鬼會陰D陰D入黎嚇我地
係唔會
至於陪我地睇個職員都唔會搞我地
但個3D真係幾真
好過電影院個D好多
真係似隻鬼爬緊出黎咁
D玻璃真係似飛出黎咁
一開始幾驚
但我後來都唔驚
因為我知係假既, 係影像黎者
但蕩蕩癲左咁係咁縮係我後面
搞到我又好驚
點知全程所有人都好鎮定
除左蕩蕩同我
羞家!!
最後陪我地隻鬼會突然對住我地衝過黎大叫左一聲
嚇死我
我諗佢係睇邊個最驚就嚇邊個
睇左我諗5分鐘到就睇完出去


隔離就係另一個鬼屋: 亡魂棺廠
呢個有做過research既人就知佢有個特別既地方
就係佢有一段路係要自己行既
所以我真係唔想玩
無可能第一個鬼屋就玩咁大呀
我嚇死左點算
但蕩蕩話無可能黎左唔玩
我諗又係既
就排下囉
呢個多D人
排左15-20MIN到
一開始又係8個人一齊入去先
入面一間房有一個女仔好似主持咁係到講野
大家又係好驚咁四處望睇下會唔會有鬼衝出黎嚇我地
呢D就係每次去到一個新環境無安全感掛
個主持就講講講啦
講下呢個鬼屋係做棺材既
近排開左條新LINE
叫我地唔駛驚等等
佢教過我地如果驚就大叫一個詞語
但我唔太記得係咩
因為個個詞語我係聽都無聽過
佢話嗌左就有人會黎"幫"我地
都唔知真定假
咁大家就一齊行啦
因為我地係排最尾
所以就跟大隊
不過之前聽同事話最尾都會有鬼係後面出黎
所以我都好驚咁不時望下後面
不過假既
唔會有鬼係後面追我地家
但唔好以為前面有人行先就會預先知邊個位有鬼嚇你
因為D鬼係揀人黎嚇
佢應該識分D人係驚定唔驚
如果你驚..去到你佢先會彈出黎/大叫黎嚇你
我就親身經歷過
明明前面個2個人行過時無事
但我一經過時個鬼突然閃出黎
又大叫囉
不過我係唔係都叫
我係由入去鬼屋既第一秒開始
就用捉實蕩蕩
之後用雙手掩住雙耳
眼就基本上係半開ONLY
口就不斷咁叫
唉~
而家諗返起都有少少羞家
所以唔好問返我每個鬼屋有返D咩
我真係唔知
我只知有人彈出黎/拍牆/大叫時我會嗌
無啦
我基本上無睇過佢地個樣
無睇過我行到去邊
其實真係幾waste家
好似我去個到只係俾佢地嚇
而唔係去感受個到既氣氛
總之我所有鬼屋都係咁啦
講返間亡魂棺廠
去到一個地方停一停
又有個男鬼係到講野
佢類似話而家就係睇條新line
但呢條新line要自己一個行
之後行上條樓梯就會見到4條sir滑梯
R哂底
我同蕩蕩講你排我後面啦
我地SIR同一條
我地2個就好明顯咁排埋同一條滑梯
個職員又唔理我地
我坐係個滑梯到已經feel到個滑梯勁滑
連SIR落去個下我都唔太敢
但馬死落地行
我就梗住頭皮咁SIR
真係超滑
有少少離心力TIM
但我真係太驚..所以滑時用手同腳撐住旁邊諗住可以減慢個速度
當然係無補於事
仲搞到我鄧親個pat pat
所以大家都係唔好咁做
enjoy sir落去個下啦
一落到去
一片迷網
因為一方面驚有鬼出黎
另一方面唔知行邊..因為有兩條路
就係係到猶豫之際
突然隔離有個鬼好大力咁拍個鐵網好惡咁叫: 行個邊呀!!!!
我唯唯諾諾咁行
勁驚囉
成條路得我一個
又暗
我又係同一個post同一個動作一路嗌一路行
最記得係行到有個位我前後都有隻鬼
我呆左係到
望住前面隻鬼仲係到表演緊佢既爭凌同大叫
都表演左有幾十秒
我係驚到問佢地我點行
前面隻鬼見我咁驚唔敢行過佢
佢唯有好無奈咁慢慢閃返去旁邊俾我過
我之後問過蕩蕩
佢話你應該照行佢就會自動閃埋一邊
I SEE
鬼知咩
佢咁恐怖
我點敢行近佢呀
後黎去到個位係前面有一塊布遮住左個入口
我又係勁驚
企左係個入口幾秒
唔敢行
之後我係揭開塊布少少偷睇入面有D咩
咩都無
唯有吸一啖氣衝入去
當然都有D鬼啦
但忽然我俾人拍左一拍個博頭
準備大叫+狂奔時
原來係蕩蕩
佢居然追上我
我都差少少唔記得左佢係我後面
最好我係到等佢啦
蕩蕩遇到我時我都遇到我前面一個女仔
佢一個人
我地2個就跟住佢行
好快就行完LU
有人陪真係好好多
之後玩埋隔離個個清宮殘異錄

根據蕩蕩既記憶
佢話「清宮最後有個荷花池

有個太后同公公

個公公仲叫我地行快D..唔好阻住太后賞花同埋留低D寶貝俾佢」
另外蕩蕩勾返起我個回憶
我係呢間鬼屋到差少少"扇"親
因為出面落兩關係
再加埋個個位既地係令既
隻鬼睇到仲要係咁笑我你差少少"扇"親喎
我都答左佢好多次係呀
佢仲要係咁repeat..
睇黎佢好開心睇到有人"扇"親
另外好似呢間有個位係全黑
真係全黑
行既時候會發現腳踩緊既係D軟林林既野
但因為你都要向前行
所以被迫踩住D唔知咩既野行過
佢應該想我地模擬踩住D人行過
因為實在太驚嚇
無論係視覺上定感觀上
所以我捉住蕩蕩已經覺得唔足夠
我忍唔住要捉住前面個女仔個袋既肩帶
佢又好驚咁同佢前面朋友講點解有人扯住佢個肩帶
我聽到即刻覺得唔好意思所以放手
同佢講: 唔好意思..係我驚得滯
玩完一出到外面
超大雨
我地急急腳去坐海洋列車上山玩
真係好彩我熟OP
唔係夜MA MA又無咩指示
只睇個地圖真係唔知點搵D鬼屋同車
上到山本身諗住玩最近個個猛鬼尾班車
上到去發現好多人
我就話會唔會最遠個個鬼屋會少D人
因為可能D人唔會/唔識行到咁遠
咁我地就去最遠個個紙紮極樂園先



去到真係少好多人
排左15MIN到就入到去
又係排最尾
蕩蕩話:「一開始要烏低身行條好窄的tunnel

仲會有人叫....

嚇親我

開始時有幾條通道揀

個男人叫我地行右面個條我地前後入

」
嗌嗌嗌
玩完
之後沿路上去排個喪屍絕地反擊戰
本身我地唔太想玩
因為射野者
好似好無聊
但因為成條樓梯都用左黎排隊
我地過唔到
所以唯有排囉
去到每人拎住支槍
之後有個男人會教點用
但好差囉佢
只教前面幾個人
我地後面個幾個拎完槍佢已經教完
之後佢就pass through我地教後面個批人
差得佢
拎住支槍都唔知點用
行入去
有D喪屍會彈出黎
拎住枝槍射我地
一開始都有射下既
但望住個MON個分都keep住唔用
又唔知點用把槍
我又驚喎
所以放棄
捉住蕩蕩
佢又行得快
係咁係到射D喪屍唔理我
我有幾個moment忍唔到扯佢D頭髮
等佢等下我
玩完好無奈咁放底把槍走人
真係好無奈囉呢個館
下一個去恐怖創作室
佢用左舊海洋館做間鬼屋
其實所有鬼屋係排緊隊時都有D特別造型既鬼陪我地玩
可以同佢地影相
但我都比較驚
因為驚佢地突然大叫
所以佢地行到黎我都係縮係蕩蕩後面
見好多人排隊時都係玩手機/用手機睇片
我同蕩蕩因為無呢D smart phone
所以我地2個就專係到食野
不斷拎我地帶黎既零食係咁食
幾好
呢個館我地係同一班初中生入去
又係最尾
班男仔一開始係咁係到互相推邊個行前
見到佢地咁都幾好笑
至於我地同2個初中女仔就行後面
我原以為個2個女仔會陪我嗌啦
點知全程得我嗌
個2個女仔勁鎮定
真係堅樣衰
又係嗌嗌嗌就完
玩完之後真係發現D鬼專揀驚既人黎嚇
諗住之後D鬼屋強裝鎮定啦
但發現我都會不期然係咁嗌
去到就忘記哂要扮野
好似嗌出黎會安心D
幫自己壯膽
之後返返上去玩猛鬼尾班車

因為雨停左
所以D鬼都出返黎同人影下相
佢地D造型真係幾靚家有D
有D就望極都唔知佢係扮緊咩
今次我地就行第一
SO TERRIBLE
蕩蕩話:「入面有學校, 同埋有好多靈位的地方

我只係記得呢2個咋」好彩有蕩蕩
點知因為我捉得蕩蕩太緊
所以搞到後面個批人追上左我地=.=
係我唔岩
蕩蕩之後仲complain我捉得佢太大力
大佬呀
驚家嘛
本能反應黎家喎
玩完呢個鬼屋見到個舞台有人表演
都幾好笑
佢地係扮娛樂圏既人載歌載舞
我最鐘意睇人扮野
所以就企係到睇哂
不過我去到睇應該都做到比較尾
無耐就做完



即刻搭列車落返山
玩埋最後個埋腥級片場

最後呢個已經盲目
反正我去到都係嗌
所以嗌埋
再望下個錶
先10點幾咋
本身一開始PLAN係玩到11點就一定要走
點知居然早左咁多
入左手信店玩左D頭飾影下相咁

出左OP後有個男仔問我地做問巻
我見我地無咩野做咪做囉
做完居然有一個OP匙鎖扣送返喎
價值20蚊家
居然蕩蕩全程無參與只係企係我隔離都有
益左佢

d 佈置都OK家