三分鐘狂熱 - 紙雕

前排屎忽癢迷上左紙雕

之後就狂借呢方面既書

而家熱情又減退啦

不過間中都有再玩下既

真係三分鐘熱度

自己動手DIY

去左三聯買黎玩下

本身諗住可能整俾同事既

但發現真係要用好多時間去整

同埋好似整完又幾無謂

無咩實際用途

最後都係放棄左呢個諗法

整完發現都幾靚

但屋企都係無位掛

而家都係放左係張書枱到咋

大澳一日遊

7月1日個日

本身諗住同肥棋去南丫島玩

點知肥棋話假日去太貴啦

所以推到之後再去

咁我又唔想留係一片愁雲慘霧既屋企入面

所以即刻邀約屎盈去佢之前plan好既大澳

個日佢明明約左我12點9係青衣城等

點知我狂奔到青衣城之後打俾佢

佢居然仲毫無廉恥咁話佢係屋企

fine

咁我咪話你知我地既規例係遲到請食飯

之後我就去左三聯到睇書等佢

我諗大約點幾佢就出現

我地搭mtr到東涌坐車去大澳

坐緊車去時，佢居然同我講話佢想噁

我個下幾驚佢真係噁

即刻叫佢倒哂佢筒粟一燒拎個樽黎噁

好彩無耐就落車

一落車就亂咁行

見到好多舖頭賣海味

可惜我地又唔會買

不過都有幾多舖頭買小食既

但岩岩落車又唔想咁快食野

所以我地都係一直行

行都去海邊

發現個日既天超靚

即刻狂影相

仲同佢影左好多沙龍照tim

之後我地走上觀景台

點鬼知有班人擺住成個涼亭

唉

真係激鬼氣

只好用個望遠鏡睇下風景就走

之後行返出去食下野

食左燒魷魚

個阿伯每次動作都勁誇張

佢每次都好凝重咁問要唔要辣

要就要加錢

O哂嘴

我同屎盈話可能唔駛都要加

食左都係咁啦

唔覺得有咩特別好食

至於個炭燒雞蛋仔

應該係我地太夜去啦

去到已經有條好長既人龍

佢仲不斷叫人唔好再排啦..唔夠賣

我第一次見到有人叫人唔好買佢野

真鬼異

我見仲有人想試下排

我同屎盈當然無咁癲

食唔到又唔會死既

我地就走去睇海豚

驚之後入黑無得睇

佢先會入棚屋睇下先

之後再出海到睇海豚

因為我坐最前個位

船開得勁快時超爽

雖然最後都見唔到海豚..但吹海風幾好呀

返到黎肥仔恥笑我俾人呃

話根本唔會有海豚

坐完船就去郵局個邊睇下

順便買左名信片俾同事們

之後行到好出就折返回家

個日雖然好熱

但睇返d相咁靚真係咩都值返啦

上年今日

上年既7月1日

我抱住一個既響往又有d擔心既心情渡過

今年既7月1日

我抱住相同既心情去左大澳玩左一日

上年係因為對我將來個一年placement充滿住憧憬

腦海中不斷幻想呢一年會點過呢

係咪會好似屎盈咁識到好多唔同placement既同學仔呢?

係咪會同班同事打成一片呢?

但同時又擔心我accept左HA既OFFER會唔會好似聽返黎咁講咁HEA呢?

會唔會真係只係不斷聽電話呢?

呢年會唔會悶到爆呢?

定係會學到好多有用既野呢?

所以可以話當時既心情既興奮又緊張

一年過去啦

我可以總結到呢一年既PALCEMENT

呢一年既PLACEMENT令我最難忘既唔係我當中學到D咩

講真呢一年既PLACEMENT真係無咩特別既技能學到

但我最開心既係識到班好好既同事

睇過我個層咁多TEAM

我慶幸我入到呢一TEAM

一開始返工時我唔太鐘意我個TEAM

因為佢地成日出去食飯

令我帶飯既夢破碎

但慢慢我鐘意同佢地出去食飯

我仲有段時間係鐘意返工

覺得每日可以同佢地一齊返工、有講有笑係一件好開心既事

當然佢地對我真係好好我先咁鐘意同佢地做同事

henry係第一個我依賴、信任既同事

因為我好多野都係由佢教我既

唔知之前有無提過

我係9樓每次問佢野時..都不期然望住佢對眼

佢對眼既眼睫毛真係好長好捲

佢講野仲好好笑

所以我好鐘意同佢傾計

唔似對住我班同學咁dry

自從搬左落黎8樓時，佢仲做埋我鄰居tim

我地成日吹水，所以越黎越熟

記得之前佢有機會俾人調走時我傷心左幾耐

好彩佢平安無事

唔係我同老闆死過

我都好放心同Henry傾「心事」

去邊到玩、final year project、將來工作既問題等等既事都會問佢意見

記得有一次我因為個user而感到好down同埋心入面好擔心個supervisor黎時

佢好快就發現到

我諗緊其實係咪我太喜形於色

佢會講D無聊既GAP黎開解我

我相信如果我係ha再做得耐d

我一定會同佢做到好朋友

因為佢俾我既感覺係值得信賴、玩得起既人

gary係一個好癲既同事

記得第一次見到佢

我眼睛簡直發光

好靚仔呀

可能我真係未見過靚仔

總之就覺得佢好靚仔

我放工急不及待同屎盈話我個team有個靚仔

等佢妒忌下

但佢地睇完佢張相時又話唔靚

我望下張相..真係無真人咁靚喎

當去太古城食飯時

佢地癲到落黎睇佢=.=

當然佢地因為只睇到佢個背面ONLY而失望而回

如果當時我同佢好似而家咁熟時

我一定會大叫佢出黎介紹俾屎盈認識

大家一定都好開心

一開始同佢唔太熟

始終我同佢係工作上無咩交集

唔似henry咁我成日要問佢野

又唔係同我地食lunch

再加上佢個外表好明顯係個潮人

我即刻望而卻步

所以佢一直係我最唔熟既同事之一

過左無耐佢又受到個大打擊

呢件事真係好值得寫一下

之前有一篇blog都寫過

但呢件事可以話係我placement呢一年黎既大事之一

我個時返工簡直係痛不欲生

成team人既氣氛係怪到不得了

因為一向都係佢係到癲我地先有野講

但個時無論返工定食lunch定搭的士時

都見到gary行屍走肉

個時我真係好驚同佢講野

真係多得廣少呢個好朋友

佢不斷撩佢講野

所以我地只要靜靜工作、靜靜食飯就得

呢段痛苦既時間我諗維持左2-3個月

佢慢慢走出陰影

開始變返佢之前既性格

所以當佢同我玩時

我因為都熟左佢地既性格

所以都開始陪佢癲

佢一見我癲過佢佢又好興奮

久而久之

我同佢關係係最尾呢幾個月變得好好

可以話係SRS Team最癲最邪惡既2個人

V姐係執我返黎既「恩人」

無佢既堅持

我係唔會入到HA識到一班同事

V姐IN我時我其實都唔太留意佢

因為當時已經好迷網

我曾經REJECT個OFFER

差少少就同佢地無相見既機會

我而家已經想像到V姐個時係幾咁嬲

個2條靚妹居然REJECT哂我

之後V姐打黎「挽留」我同屎盈時

我基本上都不為所動

我反而係因為V姐同屎盈講既一句話所動

再加上HSBC好耐都唔搵我，令我以為佢唔再IN我

我就決定死就死啦

ACCEPT啦

死死地氣打返俾V姐講我ACCEPT

我又想像到佢地班友係到恥笑緊我

呢件事據聞係傳遍我地層樓

V姐係一個好好既leader

佢做事係勁有交帶

佢會成日check住我地既status

又會講得好明要做d咩同埋要點做

我記得頭個月係到隅臭緊時

聽到v姐同d user係到傾計時我簡直嘆為觀止

原來有人個communication skill係好到咁家

勁有禮貌，又有說服力

我簡直係封v姐做我偶像

所以我成日偷聽V姐傾電話諗住偷下師

當然一年後既我無可能同v姐一樣咁勁

但我覺得我同user傾計既技巧比起一開始真係好左好多

多謝V姐

V姐都係一個勁talkative既人

其實好多時間係佢引起個話題

再由GARY同HENRY佢地搞大佢

呢個性格真係好..

「BABA你知唔知.....」「BABA........」

唔知幾時開始我就叫MIKE做BABA

叫叫下已經慣左

改唔返做MIKE

因為佢真係我地成team既baba

我地成team得佢一個已經有2個仔仔

BABA真係當我係佢個女

我真係當佢係我BABA

記得我岩岩開始時

我唔鐘意飲茶

因為要夾野食成日都覺得唔好意思

再加上我又手短

好辛苦家嘛

每當我含情蜜蜜望住我想食個D野時

BABA就會夾俾我食

好似食癈柴餐咁

再加上我同BABA都係住係青衣

所以之前飲喜酒或者出黎食飯走時

我都係跟住BABA條尾

BABA都係係我寫網頁到幫左我好多

佢會幫我諗SOLUTION

之後教返我

我覺得我一直都係係baba既保護中先可以係呢一年過得咁順利

不過..近排baba好似跟得henry同gary多

變得有少少邪惡

真係近朱者赤、近墨者黑

佢地個2個邪惡軸心

阿fung係我較為無咁熟既同事

因為佢一開始就係另一間房

另外佢搬左新office又係另一邊

之前都有一齊食飯

但後黎佢都無咩出黎食飯

所以同佢一定無同另一d同事咁熟

不過我都feel到佢係一個好好既人

沉實既一個人

佢11月就會結婚啦

我無緣去佢個婚禮

只好祝福佢婚禮能夠順利舉行

另外仲有2位同我「同甘共苦」既pp

不過我今日太tired啦

下次再寫下佢地

識左佢地班人

我覺得我生活真係豐富左

我每次講d好無知既野

佢地都會恥笑我

我個時先發現我真係有好多野係唔知家

所以我眼界開闊左

同佢地一齊雖然成日俾佢地蝦同埋恥笑

但真係好搞笑

成日都有笑料

笑到gap gap聲

同佢地經歷左咁多野

3次喜酒、見証住v姐結婚、上production前齊齊OT衝刺、上左後既痛苦時期、gary既低落時期

希望我將來出黎做野都可以遇返一班咁好既同事

至於學術上學到d咩已經唔重要了

最重要既人際關係、溝通技巧已經係呢一年裡慢慢體驗到

呢2樣已經係我呢一年placement最重要既得著了

我覺得夠啦

我要早d訓迎接同我一樣心情既下手