去完世博個夜晚我地就要坐4個鐘頭車去南京
到南京時已經11點差唔到12點
去到間酒店
見個大堂好似靚過我地上海個間喎
個個人心入面都大喜
點知
上到房
陰暗既走廊
殘舊既家具
我地仲要一開始開唔到門
搞完一輪先開到
入到去牆上仲有血跡
嚇到我roommate傻哂
最後叫人抺走佢
又安安樂樂訓左一覺
第五日
朝早都係斷去參觀
去左總統府舊址、南京博物館、中山陵
總統府舊址就係..一位總統住、議事既地方
個位總統係..我都唔太記得
查過後原來係蔣介石
好金碧輝煌
我以為總統唔會住D咁既地方
一見以為係皇帝住
因為又龍又金
咁總統同皇帝又有咩分別呢?
總統唔係知道自己唔係最高權力既咩
搞到我都好混亂
中山陵最靚
雖然係露天
又熱又曬仲要行成二百幾級樓梯上去
但行到上去望落去既風景真係超靚
最上面就係孫中山既陸墓
個到唔俾人影相
當然有大陸人係唔理
好差
係山腳個到有好多手信買
我地趕頭趕命咁買
呢個團另一樣好差既地方就係無時間俾我地買野
搞到我地每次買野都好似偷咁樣
食完午餐後就去南京大學
邀請左南京大學既講師黎同我地講下南京近代史
當然係好悶
但D人係一於少理爬哂入到訓著哂
我覺得好失禮囉
無論幾攰都應該尊重下人地
至少係坐係到唔係爬係到囉
俾人睇到原來香港既年青人都係咁無禮
完全唔尊重講野個個人
唉
都無眼睇
聽左半個鐘到就由一位南京大學生帶每組去參觀南京大學
參觀時又係另一個我覺得好羞家既野
可能我係組長
至少要好留心個南京大學生既介紹
同時都要好感覺我組兩個男生
佢地全程都同個南京大學生有互動
至於另外我地組既女仔
唔知係因為見到有人已經係到「敷衍」緊個大學生
佢地係完全唔理人地
咁我都覺得算
但重點係聽到好明顯係有笑聲傳出黎
FEEL到個笑聲既意思
唉
又一次覺得好失禮
我覺得唔理人都至少要有基本尊重人地既表現
都扮下聽囉
係我組既問題定係其他組都有呢個問題呢
要問下BECKY先知
南京大學既教學大樓全部都好古式古香
南京大學周圍都有大樹
環境好好
可惜問過個大學生
原來有D大樓係無冷氣
心諗唔係阿FA
咪熱到死
同個大學生都有傾過南京天氣
我地直言南京天氣太熱啦
HK一定好好多
佢亦都驚知原來HK係唔會落雪家
之後我地就去埋大平天國紀念館
都係好古式古香
環境都好好
不過
有件事超好笑
話說每一車人都有一個景點入面派黎既導賞員同我地講解下每個景點
之前我地參觀既景點都有呢D導賞員
咁今次個個導賞員都好悉心落力咁講下每個景點
我地當然都好用心咁聽
同埋落力咁影相
之後帶帶下就帶左我地去一間專買紀念品既屋入面
佢就好落力咁推薦我地買呢D買個D
但個到賣既唔係D咩可以催財運既大字畫就係一把六、七十蚊既木梳
我地當然不為所動
佢見我地唔買野
就即刻黑哂面
我當然就即刻?包花生出黎食
之後佢就帶我地出返去D花園仔
但佢已經完全唔介紹我地景點
直接帶我地去一個地方係影相
佢之前就好大聲咁同我地講話會幫我地免費影一張相
影既地方仲係成個館最靚既地方
就係下面個張相個到
去到已經有哂相機攝影師
仲打哂燈咁
真係好PRO喎
D人只要一企上去
音樂就會響起
後面跳舞個D人會即刻跳哂舞
我就無影
但其他人就影啦
個女人仲好落力叫我地影
NO LA
都知佢地做咁多野唔會有好野
之後佢就又帶我地去另一間屋仔
已經見到電腦上面有哂我地睇先有份影相既人D相
佢就開始推銷哂8R就幾多錢、加埋金邊又幾多錢
我地當然睬佢都傻啦
佢就俾一張我諗1R SIZE既相俾有影既人
仲細過D貼紙相
我地班人就開始係到冷潮熱諷話
「真係好開心呀~原來真係免費有相」
「真係細到自己係邊到睇唔到」
我當然食到成地都係花生
笑到死
個到D人個樣勁嬲
但又耐我地唔何
我地就拎住張1R相閃人
食完晚餐就去書城到行
咪得BECKY會真係去書城到行囉
我地班人梗係唔會咁無聊去到南京行書城啦
我地行出幾條街
個到超多野食
但我地真係無時間食野
我地用極速既時間去掃街
買左d手信
全部都係食既
