泰國曼谷自由行 - I-Residence Hotel Silom 篇

揀呢間hotel真係因為佢近BTS
仲要係市中心既一個站隔離
又唔貴
雖然有comment話佢牆身薄聽到埋隔離房D電視聲
又話沖涼D水忽冷忽熱
但佢既地理位置+價錢真係太吸引
同埋我地都無咩時間留係酒店
所以都決定揀佢

[How to get there]
首先講下點去呢間酒店
佢咁近BTS 既 
Chong Nonsi 站 
梗係搭MRT + BTS去啦
 

咁我地就由機場線轉過去 
機場線有express版(橙色線)同普通版(深藍色線)
當然express就貴D..但快D
由機場直去BTS Phaya Thai站
我地呢d咁窮既人梗係搭返普通版
車程約30min (THB 45)

泰國機場線既飛同大陸MTR既飛一樣

係機場線一個information center 拎既一張咭仔..
係話黎泰國必去十個景點
你又去到幾多個?

空無一人既大堂..
我諗係因為好多人都揀搭的士好過拎左行李係地鐵行黎行去

機場個MTR站叫 Suvarnabhumi

到左Phaya Thai 站就要出返閘
下面張相就係一出閘後見到條露天天橋駁住BTS

呼~終於到BTS 既Phaya Thai 站

BTS既飛又變返做同香港MTR一樣既咭型

車黎啦~ 我趕住上車前都要影一影成架車既樣先
泰國D 列車係會成架車都係廣告黎
好型~
同埋值得留意既係泰國D月台無香港咁好有冷氣
D月台係露天..所以都幾熱
但入到D列車佢D冷氣又勁凍
所以如果要搭得耐既話記得要帶定件外套仔
但真係咁忽冷忽熱好辛苦
我同蕩蕩到而家都唔明點解佢要開冷氣開到咁勁
回歸正傳~
到左BTS就搭 向On Nut方向既車 (淺綠色線)
到Siam站就落車但唔駛出閘
搭Silom線(深綠色線)向Wongwian yai方向既車
 
到Chong Nonsi 站一出車就睇到間酒店

 

好興奮準備衝去酒店時
見到條樓梯忍唔住講一聲: 頂!!!

泰國既BTS同MRT除左車既冷氣凍月台又熱之外
最最最令我接受唔到既就係佢D站(我唔知係某D定全部) 都可以無升降機/扶手電梯
只可以話佢對我地呢D旅客同D公公婆婆真係好
下下都要我拎住個大篋上上落落十幾二十級樓梯
真係試過我拎住個篋行緊落樓梯時可能太痛苦..有個泰國人好好心問: do u need help?
當然我無要到佢既help
但泰國人比我第一個印象已經好好
不過BTS同MRT比我既第一個印象簡直係BAD BAD BAD~~~~~~~
好勒~ 嘈完一輪抖順條氣出左BTS咪以為就到酒店
因為仲有條長命梯等住你
又要再搬多次!!
總之辛苦一輪就到間酒店
因為係網上睇過人話間酒店既大門口係停車場入面
所以一D都唔surprise
加上已經好攰
唔理得佢個大門口係咪up duck
一支箭衝入大堂

HOTEL入口

大堂: 細得黎都幾靚呀~

一入大堂已經有個Bell boy好熱情咁拎走我地既行李
check in時要俾THB1000做deposit
好彩我地又上網check過
唔係真係咩泰幣都唔唱就去check in
到時就樣衰爆!! 
BELL BOY之後就帶我地上房
去到蕩蕩拎住THB 50 散子TIPS俾個BELL BOY
之前係網上睇過話TIPS唔好俾COINS
因為d人會覺得COINS係似俾乞丐
但我地真係無紙幣
身上泰珠又真係得COINS
所以蕩蕩一路俾一路話: SORRY WE ONLY HAVE COINS
好彩個BELL BOY又幾好
笑笑口話IT'S OK. IT'S OK.
OVERALL間酒店d職員俾我地既感覺係好NICE好HELPFUL
因為我地之後煩過佢地幾次
佢地都好肯幫人!
抵讚~

[Room View]
我地住係804
算高家啦
佢得9層
9樓就係拎左黎做Bar個類
所以我地算係住房最高個層
另外我地book房時都要求唔好尾房(必必迷信既要求)+ non-smoking room
佢都full fill到哂我地所有requirement
very good~~~~~~

我地既房號

好薄身既房門..所以企係門前係完全聽到走廊D人講野
有時人地開門/珊門大聲D都以為係自己道門俾人開左LOL

 
比較surprise係間房有張雙人sofa仔
可能聽人網上話間房好細
但可能我地未住過D高級酒店
係我地眼中又唔算細
算接受到

D人話細既浴室
我地都係個句: 咁既價錢接受到啦!

齊備既沖涼用品

 
window望出去就係個BTS站
可想而知幾近呢~

訓左三晚
overall真係不錯
網上人地講話好嘈..聽到隔離房講野+電視聲
呢個情況我地so far無遇到
可能我地無咩時間係房
朝早6,7點就出去
11,12點先返
返黎係張床唔夠一分鐘就訓著
所以真係無遇到
或者係我地隔離2邊既人都好有品唔會將部電視開大聲
至於冷氣有人話唔夠勁
我地真係唔覺
我地每次沖完涼出黎反而覺得好凍TIM
不過佢有個問題就係得一張咭
所以每次出去後間房既冷氣就會熄
所以返黎時會焗焗地~
至於沖涼水壓問題
呢個問題真係有
個花灑好怪
當較到去一個你覺得適中既溫度
諗住唔郁佢沖啦
佢會慢慢咁變凍
O嘴
咁你直接再較返個個溫置
佢又會熱唔起
所以每次D水一凍就要先將個水龍頭較到最熱個位
再慢慢turn返去中間
但佢又會再自己變凍
所以沖涼時我都覺得幾煩
個人已經好攰
好想沖完即刻訓覺
居然連個安樂涼都沖唔到
所以我每次都沖得好快
事但沖下身算
最後就係 tips問題
都上網有人話間野唔俾tips打掃既人就唔會每日幫你補給返夠數既用品
所以我地都打算兜口
兜 面撞到D嬸嬸就俾D tips 佢
但又無見到
同埋又真係每日返到酒店都同我地執得乾乾淨淨
GOOD~
不過到我地check out個時佢收多我地少少錢
話我地用過佢房入面既電話打出去喎
咁我地係有咁做
去book做按摩呀嘛
但勢估唔到用個電話打出去要收錢囉
仲要唔係平TIM
咁搵笨家!!
所以住呢間酒店時就唔好亂用佢個電話啦
自己有手提就用返手提啦~

總括黎講我下次如果再黎泰國
會再住呢間酒店
或者試下佢隔離個間heritage hotel

[Tips]
- 酒店一出大門左手邊有boots同24小時既M記
- 酒店右手邊有間7-11 
 
- 出面有好多街邊檔~ 記得每樣都一試